Apple Pay 即將到港，最擔心的想必是 Tap&Go、TNG 呢兩間本地流動支付服務吧？
不過 TNG 似乎已經做好準備，今日推出 TNG 2.0 版本，為流動支付服務加入四大新功能，包括現金提款、信用卡轉帳、銀行轉帳等等，仲預告之後可以用埋黎係巴士、小巴上面俾車費，勁過 Apple Pay 喎！
雖然 Apple Pay 係美國推出在先，但去到英國就架勢到打通埋公共交通，搭地鐵一樣可以用 Apple Pay 俾錢，相當方便，不過來到香港的合作商戶仍然以連鎖商家為主，交通付款一概欠奉。
而 TNG 就搶飲頭啖湯，預告未來將加入 Bus Pass 支付功能，可以好似英國 Apple Pay 咁，用手機係巴士、小巴俾車費。
TNG 會係巴士、小巴車身安裝藍牙 beacon 技術，一上車 TNG App 就會自動彈出付的 QR Code，將手機螢幕面向巴士的掃瞄器就 OK，而且 TNG BusPass 同 Apple Pay 一樣可以離線完成支付，就算網絡環境唔係咁好，都一樣俾到錢唔怕尷尬。
此外 TNG 亦會開發 Apple Watch / Android Wear 版本，等用家可以直接用錶顯示 QR Code 俾錢。
可能用家會問，咁用落其實同八達通差唔多，咁 TNG 又有咩吸引力呢？
A：TNG 行政總裁就話，TNG 面向商戶的收費會對八達通等競爭對手為低，以吸引巴士公司、小巴公司安裝；至於對於我地呢班實際用家來講，就會有類似「搭十程送一程」「送咖啡店優惠券」之類的優惠。
幾時先有得用？咩巴士、小巴線會有？
A：TNG 表示現時已經同幾間巴士公司、小巴公司簽約，但由於正等待運輸署審批，所以暫時仍未公佈詳細的合作企業。至於邊條巴士、小巴線會有呢？同樣要等巴士公司、小巴公司安排及公佈。
